Starfsfólk HS Veitna lét einnig til sín taka í fagkeppni Samorku þar sem keppt var um titilinn Fagmeistari Samorku. Þar hafnaði lið HS Veitna í öðru sæti eftir glæsilega frammistöðu í harðri keppni sem reyndi á bæði fagþekkingu og verklega færni þátttakenda.
Erindin endurspegluðu vel þau verkefni sem eru efst á baugi hjá HS Veitum. Annars vegar hvernig tryggja megi örugga og hagkvæma þjónustu til framtíðar með markvissri uppbyggingu og endurnýjun veitukerfa og hins vegar hvernig mæta skuli nýjum áskorunum sem fylgja hraðri tækniþróun, breyttum notkunarmynstrum og auknum kröfum um rekstraröryggi.
Mikil umræða skapaðist um þróun innviða sem víða eru komnir á miðjan aldur eða eldri. Líkt og fram hefur komið hjá HS Veitum eru gögn, greiningar og snjallvæðing sífellt mikilvægari verkfæri við ákvarðanatöku um endurnýjun og framtíðaruppbyggingu. Með tilkomu snjallmæla og aukinni gagnasöfnun skapast ný tækifæri til að fylgjast með ástandi kerfa, bæta þjónustu við viðskiptavini og nýta auðlindir með hagkvæmari hætti.
Þá var fjallað um hvernig samfélagsþróun hefur áhrif á veitukerfin. Fólksfjölgun, uppbygging nýrra atvinnusvæða, aukin nýting glatvarma og nýjar tæknilausnir kalla á að horft sé lengra fram í tímann við hönnun og þróun innviða en áður hefur tíðkast.
Reynsla HS Veitna af eldvirkni og náttúruhamförum á Reykjanesskaga var einnig áberandi í dagskránni. Fjallað var um neyðarviðbrögð, samskipti við almenning í almannavarnaástandi, lagnir sem lent hafa undir hrauni og þær aðgerðir sem gripið hefur verið til til að tryggja afhendingaröryggi vatns og hita við fordæmalausar aðstæður. Sú reynsla hefur vakið athygli víða og skapað mikilvægan lærdóm fyrir veitur um land allt.
Jafnframt voru kynnt þróunarverkefni sem snúa að nýtingu orku og auðlinda með nýjum hætti, þar á meðal varm¬dælulausnir í Vestmannaeyjum og verkefni sem tengjast aukinni nýtingu bakrásarvatns og glatvarma.
Í tengslum við fagþingið buðu HS Veitur þinggestum í fordrykk í höfuðstöðvum fyrirtækisins í Reykjanesbæ. Þar gafst tækifæri til að ræða við starfsfólk, kynnast starfsemi fyrirtækisins og skiptast á hugmyndum um framtíð veitna og innviða á Íslandi
Þótt fimmtíu ár séu liðin frá stofnun Hitaveitu Suðurnesja, forvera HS Veitna, standa sömu grunngildi enn sterkt: framsýni, fagmennska og uppbygging innviða sem þjóna samfélaginu til langs tíma. Þátttaka HS Veitna á Fagþingi Samorku var skýr áminning um að framtíð veitukerfa byggir ekki aðeins á sterkum mannvirkjum heldur einnig á þekkingu, nýsköpun og hæfu starfsfólki sem er tilbúið að takast á við verkefni morgundagsins.
