|
|
|
Hitaveita
HS Veitur reka
fjarvarmaveitu í Vestmannaeyjum. Í kyndistöð fyrirtækisins er
gufa framleidd með rafskautakatli og vatn veitunnar hitað upp
með gufunni. Dreifikerfið er tvöfalt það er að segja framrás og
bakrás. Heitu vatninu er dælt um framrásina til heimila og
fyrirtækja, eftir notkun er vatninu dælt til baka og það hitað
upp aftur. Tvö dreifikerfi eru í bænum, efra dreifikerfi og
neðra dreifikerfi. Allt vatn er selt í gegnum mæla. Aðallega eru
það rennslismælar og örfáir orkumælar. Uppsettir mælar hitaveitu
eru 1428.
Á síðustu öld voru heimili og fyrirtæki Í Vestmannaeyjum
nær eingöngu hituð upp með olíu. Olíukatlar voru í hverju húsi í
sérstöku rými sem oftast var kallað kyndiklefi eða olíufírkompa.
Olíutankurinn var síðan út á lóð næst útvegg kyndiklefans. Einn
helsti gallinn við olíukyndinguna var eldhættan, eldsvoðar voru
tíðir af þeim sökum.
Árið 1962 var lagður sæstrengur til Vestmannaeyja og þá
skapaðist möguleiki að nota rafkyndingu sem margir nýttu sér. Ný
hús voru nær eingöngu með rafkyndingu og aðrir skiptu úr
olíukyndingu í rafkyndingu. Árið 1973 varð eldgos á Heimaey og
eftir þær hamfarir skapaðist enn einn möguleikinn með upphitun
húsa, en það var hraun-hitaveita sem nýtti varmann frá hrauninu
sem rann í gosinu. Hitaveita var þá lögð um bæinn og varminn
nýttur frá hrauninu sem var einstakt á heimsvísu. Árið 1988 var
varminn ekki nægur til að uppfylla orkuþörf veitunnar og upp frá
því hefur rafskutaketill séð um orkuþörf veitunnar.
Vatnsveita
HS Veitur reka vatnsveitu í Vestmannaeyjum. Vatn veitunnar
er tekið úr tveimur vatnslindum í landi Syðstu Merkur á
fastalandinu. Vatninu er dælt um neðansjávarvatnsleiðslur til
Vestmannaeyja og þaðan um dreifikerfið. Tvö dreifikerfi eru í
bænum, efra dreifikerfi og neðra dreifikerfi. Allt vatn er selt
í gegnum rennslismæla. Uppsettir mælar vatnsveitu er um 1550.
Fram til 1968 var viðvarandi skortur á vatni í
Vestmannaeyjum. Árið 1968 var lögð neðansjávarvatnsleiðsla til
Vestmannaeyja sem leysti skort á vatni og ekki síst heilbrigðu
vatni. Fram að þeim tíma var rigningavatni af þökum húsa safnað
saman í vatnsbrunna sem voru í hverju húsi.
Rafveita
HS Veitur reka rafveitu í Vestmannaeyjum.
Rafmagnið kemur frá fastalandinu í gegnum tvo sæstrengi sem
leiddir eru í aðveitustöð fyrirtækisins í Vestmannaeyjum og
þaðan dreift um dreifikerfið í bænum. 150 hús eru enn rafkynnt í
Vestmannaeyjum en fer fækkandi. 38 dreifistöðvar eru í bænum.
Uppsettir mælar rafveitu eru 2346.
Stofndagur rafveitu í Vestmannaeyjum telst vera 25.
ágúst 1915 en þá var tekin í notkun fyrsta díselvélin á Íslandi
að talið er, 50 hestafla Güldner. Vél þessi er uppsett og til
sýnis í höfuðstöðvum HS í Vestmannaeyjum. Rafstöð var síðan
reist við Heimatorg í lok seinni heimstyrjaldar. Rafstöðin gat
framleitt 4900 kílówött þegar mest var. Árið 1962 kom síðan
sæstrengur til Vestamannaeyja og var rafstöðin þá hugsuð sem
vara og toppstöð. Rafstöðin fór undir hraun í eldgosinu 1973.
Annar sæstrengur var síðan lagður til Vestmannaeyja árið 1974.
Vara- og toppstöð rafveitunnar er nú staðsett í vélasal
fyrirtækisins, um er að ræða sjö Caterpillar vélar sem geta
framleitt um 5 MW.
|
|