Rafdreifing á Árborgarsvæði
HS Veitur rekur rafdreifiveitu í Árborg. Hitaveita Suðurnesja tók við sem dreifiveita á svæðinu af Selfossveitum árið 2004 en að því fyrirtæki höfðu staðið fyrrum Eyrarbakkahreppur, Stokkseyrarhreppur og Selfosskaupstaður sem lagt höfðu til fyrirtækisins rafveitur sínar auk sameignlegrar hitaveitu (Hitaveitu Eyra). Árið 2009 tók HS Veitur við dreifingu á svæðinu eftir að Hitaveitu Suðurnesja var skipt upp í tvö fyrirtæki.

Dreifikerfi HS Veitna nær til þéttbýlisins á Selfossi, fyrrum Stokkseyrarhrepps, Eyrarbakkahrepps og Laugadælalands austan við Selfoss. Afhending frá flutningskerfi rafmagns er frá aðveitustöð Landsnets að austanverðu á Selfossi en þaðan liggur háspennulína að Sogsvirkjunum. Tenging er einnig frá aðveitustöð til tengistöðvar Landsnets á Hellu. HS hf starfrækir þjónustudeild á Selfossi sem annast alla þjónustu við þá sem tengdir eru dreifikerfinu auk þess að sinna þjónustu við gatna- og stígalýsingu á svæðinu.

Rekstur dreifikerfis rafmagns á svæðinu nær til baka til ársins 1916 - 1918 þegar Kaupfélagið Ingólfur á Stokkseyri lét setja upp litla ljósastöð til að lýsa upp verslunarhúsnæði félagsins og nokkur íbúðarhús í grenndinni. Árið 1922 var síðan komin tenging í öll hús í þorpinu og nýr vélarkostur komin í stað eldri vélar en kaup á henni var á ábyrgð hreppsins.

Svipuð þróun átti sér stað á Eyrarbakka þar sem einka-rafstöðvar voru settar upp á árunum 1917 – 1918 en síðan árið 1920 var komið á dreifiveitu á vegum Eyrarbakkahrepps. Árið 1947 voru bæði þorpin síðan tengd línu frá Selfossi um tengivirki miðja vegu milli þorpanna. Minnisvarði er nú um rafstöðina á Eyrarbakka við lóðina þar sem hún var til húsa. Á Selfossi má rekja fyrsta vísi að rafmagnsdreifingu til ársins 1929 – 1932 og var það Kaupfélag Árnesinga sem stóð að þeirri framkvæmd en einnig hafði Mjólkurbú Flóamanna komið sér upp ljósavél. Vélar voru stækkaðar alveg fram til þess tíma að tenging við Sogsvirkjanir komst á í ágúst 1947 en eftir það hófst uppbyggingarskeið dreifiveitunnar þar.

Í upphafi rafmagnsdreifingar (1920) bjuggu í hreppunum þremur um 1.600 manns, (þó aðeins um 60 á Selfossi) en í dag búa á svæðunum um 7.554 manns. Alls eru 7.720 íbúar í Árborg að vori 2008.

Á dreifiveitusvæðinu í Árborg eru nú (2008) um 3.120 heimtaugar og mælitæki hjá notendum sem eru um 3.680.