Íslenska Ánægjuvogin er samstarfsverkefni nokkurra Evrópuþjóða um mælingar á ánægju viðskiptavina helstu fyrirtækja í nokkrum atvinnuvegum.

Markmiðið er að láta fyrirtækjum og í sumum tilfellum neytendum í té samræmdar mælingar á ánægju viðskiptavina.   Þá er og markmið verkefnisins að meta nokkra aðra þætti sem tengjast ánægju viðskiptavina – hafa áhrif á hana (t.d. ímynd og mat á gæðum) eða verða fyrir áhrifum hennar (tryggð viðskiptavina). Mikilvægi mælinga á ánægju viðskiptavina og áhrifaþáttum hennar er mikið þar sem tryggilega hefur verið sýnt fram á í rannsóknum að því ánægðari sem viðskiptavinir fyrirtækis eru því betri afkomu má fyrirtækið búast við.

Í rannsókninni er ánægja viðskiptavina fyrirtækja metin ásamt nokkrum öðrum yfirþáttum, svo sem ímynd, væntingum, gæðum vöru og þjónustu, verðmæti og tryggð viðskiptavina. Mælingar eru staðlaðar á milli fyrirtækja, atvinnugreina og þjóða; það er, viðskiptavinir eru spurðir nokkurn veginn sömu spurninga óháð fyrirtæki, atvinnugrein eða þjóð og þannig verða niðurstöður samanburðarhæfar.

Árið 2008 er sjöunda árið sem Íslenska ánægjuvogin er notuð til að meta ánægju með rafveitur á Íslandi og við starfsfólk  HS Veitna / HS Orku (Hitaveitu Suðurnesja ) höfum unnið þessi verðlaun frá upphafi mælinga.