Spurningar og svör rafveita
Hvað er aðaltafla?
Til að taka á móti raforku þarf rafmagnstöflu sem nefnist aðaltafla. Aðaltaflan
er hjarta rafkerfis hússins. Aðaltaflan er oft eina taflan í minni einbýlis- og
raðhúsum. Í stærri húsum eru oftast einnig undirtöflur sem kallast greinitöflur
og fá tengingu frá aðaltöflu.Hver rafmagnsheimtaug frá HS Veitna verður að
tengjast einni aðaltöflu. Krafa HS Veitna hf um búnað í aðaltöflu er aðalvarrofi
(í eldri töflum geta aðalvar og aðalrofi verið í tvennu lagi) og aðstaða fyrir
orkumælir eða orkumæla sé um fleiri notendur að ræða. Taflan sjálf og búnaður í
henni þarf að uppfylla ákvæði reglugerða um raforkuvirki.
Hvað er kílówattstund (kwh)?
Kílówattstund er mælieining fyrir orku. Orka er margfeldi af afli og tíma Aflið
er mælt í kílówöttum (1000 Wött er 1 kílówatt) Tíminn er mældur í klukkustundum.
Afl tækja er skráð á kenniskjöld tækis, eða merkiplötu þess. Þar er aflið gefið
upp í kílówöttum (kW) eða í wöttum (W). Ef afl er gefið upp í wöttum þarf að
deila með 1000 til að finna hversu mörg kílówött tækið tekur. Athugið að rugla
kílówöttum ekki saman við kílówattstundir. Kílówattstundir verða fyrst til þegar
tækið er í gangi í einhvern tíma. Til að finna hversu mikla orku tækið tekur
þarf að margfalda afl þess í kílówöttum með þeim klukkustundum sem það er í
gangi.
Hvað er ótryggt rafmagn?
Raforka sem seld er samkvæmt sérstökum samningi milli rafveitu og orkukaupanda
og samningurinn síðan staðfestur af Landsvirkjun. Helstu skilmálar samningsins
eru meðal annars þeir að uppsett afl sé að minnsta kosti 100kw og árleg notkun
500.000.kwh að lágmarki. Einnig að kaupandi uni skerðingu og að verðlagning
rafmagnsins taki mið af vatnsbúskap Landsvirkjunar og líklegri skerðingu.
Ótryggt í þessu sambandi merkir að Landsvirkjun ábyrgist ekki afhendingu en á
ekkert skylt við öryggi eða öryggismál almennt.
Hvað eru sparperur?
Sparperur eru flúrperur sem passa í perustæði fyrir venjulegar glóperur og eru
með nauðsynlegan rafbúnað innbyggðan . Sparperur gefa álíka mikið ljós og
glóperur sem nota fjórum til fimm sinnum meira rafmagn. Vandaðar sparperur eiga
að endast í meira en 8.000 klukkustundir og þola að minnsta kosti 20.000
kveikingar. Til samanburðar má geta þess að árið er 8.760 klukkustundir.
Sparperur eru hins vegar enn sem komið er talsvert dýrari.
Ef einhverjar spurningar vakna þá vinsamlega hafið samband við HS Veitur hf.
í síma 422-5200 eða sendið okkur fyrirspurn á hs@hs.is